သွန်းဆင့်မိုးရည် ၇လပြည့်မွေးနေ့နှင့် ချော့ကလက်ကိတ် (French)

မနေ့က သမီးလေး မွေးတာ ၇လပြည့်တယ်။ အခု သွန်းဆင့် သွားတချောင်းပေါက်နေပြီ။ ချိုမိုင်မိုင် (လက်ချောင်းလေးတွေ ကွေးလိုက်ဆန့်လိုက်လုပ်တာ) လုပ်တတ်ပြီ။ သူ့ကိုချီစေချင်ရင် လက်ကလေး ဆန့်ပြီးခေါ်ခိုင်းတတ်သလို မခေါ်ရင် စိတ်တိုပြီးအော်တတ်ပြီ။ အရင်ကဆို သူ့ကိုချီထားပြီး လက်ပ်တော့ရှေ့ စာဖတ်လို့ရပေမယ့် ခုလက်ပ်တော့ရှေ့ထိုင်တာနဲ့ ကီးဘုတ်ကို တဗျန်းဗျန်းရိုက်တယ် ပေးမကိုင်ရင်ငိုလို့ သူ့ကိုချီပြီး စာဖတ်လို့ မရတော့လို့ ဘလော့ဂ်တောင် ကောင်းကောင်းမလည်ရဘူး။ အိမ်မှာ ကျမက ကျမအမေကို မေကြီးလို့ခေါ်ပြီး သမီးကြီးရှင်မိုးရည်က ကျမကို မေကြီး ဒါမှမဟုတ်ရင် မာမီလို့ ခေါ်ပါတယ်။ သွန်းဆင့်ကတော့ ကျမကို အခု "အမေ"လို့ (သူဘယ်သူ့ဆီကမှ မကြားဖူးပဲ) ခေါ်နေပါတယ်။ ကလေးငယ်လေးတွေဟာ "မ"သံကို အရင်ထွက်တတ်ကြတယ်လို့ တော့ကြားဖူးပါတယ်။ ပြီးခဲ့တဲ့အပတ်က နေမကောင်းဖြစ်လို့ ဒီလ၀ိတ်လဲမတက်ဘူး။ မနေ့က ချော့ကလက်ကိတ် စမ်းပြီးဖုတ်တာ အောင်မြင်လို့ သွန်းဆင့် ၇လပြည့်မွေးနေ့နဲ့လဲ တိုက်နေတာနဲ့ မွေးနေ့ကိတ်လုပ်လိုက်တယ်။  
Happy Birthday လုပ်ထားတဲ့ ပုံလေးတွေပါ။

ပထမဆုံးလက်ရာ ချော့ကလက်ကိတ်

သွန်းဆင့် ၇လပြည့်မွေးနေ့ အမှတ်တရ

သားအဖ သုံးယောက် သွန်းဆင့် weight=9kg, Height=73cm

မေကြီးအတွက်

ချော့ကလတ်ကိတ်လုပ်နည်း (လုပ်နည်းကို youtube မှယူပါသည်။)
ပါဝင်သောပစ္စည်းများ
Dark ချောကလက်  200g
ထောပတ်              180g
သကြား                  70g (အချိုကြိုက်ရင် ပိုထည့်ပါ)
ကြက်ဥ                   ၄လုံး
Plain Flour               1 tablespoon

မီးဖိုပေါ်တွင် အိုးတစ်လုံးဖြင့် ထောပတ်၊သကြား၊ချော့ကလက်တို့ကို အရည်ပျော်အာင် ကျိုထားပါ။ ကိတ်မုန့်ဖုတ်မည့် ခွက်အတွင်းဘက် အောက်ခြေနှင့် ဘေးပတ်ပတ်လည်ကို baking paperဖြင့် ကပ်ထားပေးပါ။ ပန်းကန်လုံးတခုအတွင်း ကြက်ဥများကို ပွအောင်မွှေပေးပြီး plain flour ကို ဇကာဖြင့်စစ်ထည့်ပြီး ထပ်မွှေပေးပါ။ ပြီးလျှင် အရည်ကျိုထားသော ချော့ကလက်များပါထည့်ပြီး မွှေပါ။ အားလုံးသမအောင် မွှေပြီးရင် ကိတ်ဖုတ်မည့်ခွက်ထဲထည့်ပါ။ ခွက်ရဲ့ပတ်လည်ကို Aluminum Foil ဖြင့်ပတ်ထားပါ။ ဗန်းတခုထဲသို့ Aluminum Foil ဖြင့်ပတ်ထားတဲ့ ကိတ်မုန့်ဖုတ်မည့်ခွက်ကို ထည့်ပြီး ဗန်းထဲသို့ ရေနွေး ၂စင်တီမီတာလောက်ထည့်ပါ။ ပြီးလျှင် oven ထဲထည့်ပြီး 170 degree C ဖြင့် 35-40 min ကြာအောင်ဖုတ်ပြီးလျှင် အရသာကောင်းမွန်သော ချော့ကလက်ကိတ်လေးရပါပြီ။ ကိတ်ရရင် တနာရီကြာမှ ခွက်ထဲက ထုတ်ပါမယ်။ ခွက်ထဲကထုတ်ပြီး နောက်ထပ် ၂နာရီကြာရင် စားလို့ရပါပြီရှင်။

oven ထဲကို ဒီပုံအတိုင်းထည့်ပါတယ် (အောက်ခြေက ဗန်းထဲမှာရေနွေးထည့်ထားပါတယ်)